Rom 13 | MED | STEP | Wamp mbᵾ ndi pora, gapman nga nᵾng ik mbᵾ teng ndᵾi! Ei nambuⱡ emel, gapman mbᵾ oⱡa ok, weni muⱡi nambᵾrmᵾn mon. Wote, gapman mormin mbᵾ, Got ndi, tᵾpa mondrum.

Romans 13

Tᵾn Gapman Nga Mana Orunga Muⱡmin

1 Wamp mbᵾ ndi pora, gapman nga nᵾng ik mbᵾ teng ndᵾi! Ei nambuⱡ emel, gapman mbᵾ oⱡa ok, weni muⱡi nambᵾrmᵾn mon. Wote, gapman mormin mbᵾ, Got ndi, tᵾpa mondrum. 2 Wamp nam ti ndi, akup gapman mormin mbᵾ nga ik tᵾpa roi ndum ndam, Got nga uⱡ etᵾm mbᵾ tᵾpa roi ndumba. Wote, elim uⱡ ei mel em ndam, elim mindil kit tᵾmba. 3 Uⱡ kun kai etmin wamp mbᵾ ndi, kapⱡa gapman wu nuim mbᵾ nga mundmong inding mel kapⱡa mon. Uⱡ kit etmin wamp mbᵾ ndi, mundmong etmin. Gapman wu nuim ti nga mundmong iti nᵾtimp nᵾkᵾn pin ndam, uⱡ kun kai mbᵾ mint itana, nim nga kaip nindᵾmba. 4 Ei nambuⱡ emel, gapman wu ei, Got nga kongun kindmant wamp ei, nim nga orunga molkᵾn kai mundun nimba kongun endᵾtᵾm. Wote, nim uⱡ kit mbᵾ, in ndam, wote gapman wu nuim ei nga mundmong iti. Ei nambuⱡ emel, wu gapman ei ndi, nim kan ngumba ei nga ronduⱡ ei, tepa morum. Wu gapman morum ei, Got nga ik ei pilpa tᵾpa, kongun kindmant endpa, uⱡ kit etmin wamp mbᵾ etpa kit mondrum. 5 Uⱡ ei nga, akup tᵾn gapman nga mana orunga muⱡmin. Ei nambuⱡ emel, tᵾn gapman nga ik tᵾpᵾn roi ndᵾmᵾn ndam, tᵾn tᵾpa mbun ngumba. Wote, tᵾn nga numan mbo ila, uⱡ kun kai mbᵾ etpᵾn, gapman nga mi ik mbᵾ, pep ropᵾn muⱡmin.

6 Uⱡ puⱡ ila nga enim ku moni takis ngurmin. Nambuⱡ emel, gapman wu mbᵾ, kongun ronduⱡ mundᵾk etmin ei, Got nga kongun endᵾtmin. 7 Gapman nga namba mel ti, nim kᵾn punt moⱡum ndam, punt rui mint. Nim nga ku takis ngukᵾn, wote nim nga kongun kona tetᵾm mbᵾ nga ku takis ngukᵾn, wu mbᵾ kaip nᵾndkᵾn, tᵾkᵾn ou ndukᵾn iti!

Nim Ndi, Wamp Mbᵾ Numan Ngui

8 Wamp ti nga mel ti nim kᵾn punt muⱡi nᵾmbᵾⱡangga! Akup nim ndi, mel ti punt mondkᵾn, nim wamp numan ngurun uⱡ ei, ronduⱡ mundkᵾn ngui! Ei nga, wamp nam ti, uⱡ ei mel em ndam, Got nga mi ik mbᵾ nga puⱡ petᵾm ei mel, pep romba. 9 Nambuⱡ emel, Moses nga mi ik kᵾⱡ ndi, ei mel nᵾtᵾm,

“Nim wapra rui nᵾri! Wamp ti rokᵾn kundi nᵾkᵾndi! Kᵾndᵾp nui nᵾni! Wamp ti nga mel ti, kandkᵾn kum pindi nᵾpindi!” nitim.
Mi ik kᵾⱡ kᵾn, wote mat petᵾm mbᵾ, kᵾmp kᵾm mi ik tenda ei ndi, tᵾpa kum ropa pora ndurum.
“Nim ninim numan ngurun ei mel, nim nga manga keta kup wamp ei, i ku etkᵾn numan ngui! 10 Nim wamp ti, numan ngun ndam, wamp ei kᵾn uⱡ ⱡawa ti kapⱡa iti nᵾtᵾn mon! Ei nga, wamp numan ngui uⱡ ei in ndam, kapⱡa mi ik petᵾm mbᵾ, kᵾmp kᵾm pep ruin!” nitim.
11 Nambuⱡ emel, uⱡ ei mel iteing nᵾnt? Akup ya ui mormin ei, enim pilik poⱡ ndunmin. Enim ur petmin ei kelik, rut nᵾk oⱡa muⱡing ui ei akup. Nambuⱡ emel, Got kᵾn unt puⱡ mondpᵾn mondᵾp pitmin ni kᵾn, unt tᵾn etᵾp timp nitim ui ni, wote akup omba nondpa enim. 12 Rumbuⱡ murum ni, nondpa pora nimba enim, rᵾⱡang ei, nondpa omba enim. Ei kᵾn, akup rumbuⱡ muⱡi uⱡ mbᵾ, wak ropᵾn, rᵾⱡang ila moⱡpᵾn, el itmin ei nga el mel mbᵾ, tᵾp ᵾmbᵾⱡmin. 13 Tᵾn nga mul orunga, pilpᵾn tᵾpᵾn kun etpᵾn, rᵾⱡang ila wamp mormin ei mel muⱡᵾmin. Kara puk, nu nok kekilip rok, wapra rui uⱡ, popuⱡ mondᵾk, el rok, wᵾlᵾk rok uⱡ kit mbᵾ pora, tᵾn iti nᵾtmin mon! 14 Uⱡ mbᵾ pendᵾk kelik, wote wu Nuim Jisas Kraist nga el mel kᵾⱡ, tᵾk ambulk muⱡᵾi! Enim nga kᵾng kit kᵾⱡ nga numan mondrum uⱡ mbᵾ, etᵾp timin nᵾk uⱡ ti, iti nᵾtᵾi mon!